აბორტების სტატისტიკა საქართველოში – 2004-2012 წლები

2013 წლის 22 მაისს ინფორმაციის თავისუფლების განვითარების ინსტიტუტმა (IDFI) შრომის, ჯანმრთელობისა და სოციალური დაცვის სამინისტროდან მიიღო ინფორმაცია 2004-2012 წლებში საქართველოში ჩატარებული აბორტების შესახებ. მიღებული დოკუმენტაციიდან ირკვევა, რომ ცხრა წლის განმავლობაში (2004-2012)  საქართველოში ორსულობის შეწყვეტის ფაქტებმა საგანგაშო ციფრი 221 160 შეადგინა. ამასთან აღსანიშნავია ის ფაქტი, რომ აბორტების დინამიკა ყოველწლიურად მატულობს და 2004 წლის მონაცემთან შედარებით 2012 წლის წინასწარი მონაცემი 130%-ით არის გაზრდილი. რაც შეეხება ხელოვნური აბორტების რიცხვს, 2012 წლის მაჩვენებლებით, ხელოვნური აბორტების რაოდენობა 300 % – ით  არის გაზრდილი 2004 წლის მონაცემთან შედარებით, ხოლო 2011 წელთან მიმართებაში ზრდა 28%-ს შეადეგნს (7394 შემთხვევით მეტი, სულ 34 253 აბორტი). აღნიშნულ პერიოდში ორსულობის შეწყვეტის შემთხვევების დინამიკა წლების მიხედვით შეგიძლიათ იხილოთ ქვემოთ მოცემულ დიაგრამაზე.

საქართველოში მზარდი ტენდენცია შეინიშნება, როგორც ხელოვნურ ასევე თვითნებური (სპონტანური) აბორტების შემთხვევებშიც. 2004 წლის მონაცემთან შედარებით 2012 წელს თვითნებური აბორტების რაოდენობა გაზრდილია დაახლობით 110% -ით.

მნიშვნელოვანია მონაცემები, თუ როგორ გადანაწილდა აბორტები ასაკობრივი ჯგუფების მიხედვით. როგორც ირკვევა, ორსულობის შეწყვეტის შემთხვევები 15 წლამდე მოზარდების ასაკობრივ კატეგორიაშიც არის დაფიქსირებული,  2012 წლის მონაცემებით მათ მიერ ჩატარებული აბორტის 20 შემთხევა დაფიქსირდა (მათ შორის 11 ხელოვნური). 2012 წელს აბორტების ყველაზე  დიდი წილი 48,2% (სულ 18923, მათ შორის ხელოვნური – 16280) მოდის 20-29 წლამდე ასაკის ჯგუფზე.

2004-2012 წლებში აბორტების რაოდენობა  ასაკობრივი ჯგუფების მიხედვით წარმოდგენილია ქვემოთ მოცემულ ცხრილში:

სამინისტროდან მიღებული დოკუმენტაციაში აგრეთვე მოცემულია აბორტების მაჩვენებლები შესაბამისი ასაკის 1000 ქალზე დაანგარიშებით. როგორც ირკვევა 2012 წლის წინასწარი მაჩვენებლით ყოველ შესაბამისი ასაკის 1000 ქალზე აბორტის რიცხოვნობა შეადგენს 31-ს.  აღნიშნული მაჩველებლები წლების  მიხედვით გამოიყურება შემდეგნაირად:

საინტერესოა აგრეთვე ის ფაქტი, რომ საქართველოში აბორტის ძირითადი ოდენობა მეორე და შემდგომ ორსულობაზე მოდის.  2011 – 2012 წლებში პირველი ორსულობის დროს აბორტების კლებადი ტენდენცია შეინიშნება.

აღსანიშნავია აგრეთვე ის ფაქტი, რომ საქართველოში მინი აბორტების (ორსულობის 5 კვირამდე პერიოდი) წილი   ორსულობის შეწყვეტის სრული ოდენობის მხოლოდ 34% დან  – 42% მდე მერყეობს.

ზემოთ მოყვანილი მონაცემები ინსტიტუტის მიერ გამოთხოვილი იქნა აგრეთვე საქართველოს სტატისტიკის ეროვნული სამსახურიდან. მათ მიერ მოწოდებული იქნა 2004-2011 წლების მონაცემები.  სამინისტროდან და სტატისტიკის ეროვნული სამსახურიდან მიღებულ მონაცემებს შორის გამოვლენილია მცირე განსხვავებები, რომელიც უკავშირდება 2011 წლის მონაცემებს, თუმცა საქართველოში არსებული აბორტების ზრდის საგანგაშო დინამიკა ორივე დაწესებულებიდან მიღებული მონაცემებით დასტურდება.

p.s. საქართველოს შრომის, ჯანმრთელობისა და სოციალური დაცვის სამინისტროს მიერ მოგვიანებით მოწოდებული იქნა 2012 წელს ჩატარებული აბორტების შესახებ მცირედით განსხვავებული (გაზრდილი) მონაცემები. ჩვენს მიერ თავდაპირველად გამოქვეყნებული სტატისტიკური მონაცემები შეცვლილი იქნა სამინისტროსგან მიღებული უახლესი მონაცემებით. 2012 წლის საბოლოო მონაცემებს სამინისტრო 2012 წლის ივნისის თვეში შემოგვთავაზებს. სავარაუდოდ სააბოლოო მონაცემები 2012 წელს საქართველოში ჩატარებული აბორტების შესახებ კიდევ გაიზრდება.

სტატიის გამოქვეყნების შემდგომ, ინსტიტუტს დაუკავშირდა ჯანდაცვის ექსპერტი ბატონი ქართლოს კანკაძე, რომელმაც აღნიშნა, რომ აშშ-ს  დაავადებათა კონტროლის და პრევენციის ცენტრისა და საქართველოს დააავადებათა კონტროლის და საზოგადოებრივი ჯანმრთელობის ეროვნული ცენტრის მიერ 2010 წელს ერთობლივად ჩატარებულმა კვლევამ გამოავლინა შემდეგი: საქართველოში აბორტების საერთო რაოდენობა მნიშვნელოვნად შემცირდა ბოლო 10 წლის განმავლობაში.